సరస్వతి ప్రార్థన

 సరస్వతి ప్రార్థన

చెరుకు రామ్మోహన్రావు

ఏ దేవి సకల కవీంద్ర జిహ్వా పుండ

రీక నివాస మంగీకరించు

ఏ దేవి జడ పైన ఎనలేని రత్నమై

ఒదుగు చంద్రుండెంతొ ఉజ్వలముగ

ఏ దేవి గళసీమ నింపునింపెడు హీర

నీహార హారాల నిండుకాంతి

ఏ దేవి ఎకిరింత ఎన్న రాయంచయై

శ్వేతపద్మాసన సేవ కొదుగు

హస్తముల కీర పుస్తక అక్షమాల

వీణ కల్గిన ఏ దేవి విధికి సుదతి

అట్టి తల్లిని తిరముగానాత్మ దలచి

వేడుకొందుము శుభముల వెల్లువలకు.

భావం :

ఏ తల్లి కవీశ్వరుల నాలుకలు అను, పుండరీకములు అంటే, ఎర్రతామరల పైన నివసిస్తుందో,ఏ తల్లి సిగపువ్వుగా జడలో నెలవంక విలసిల్లుతుందో , ఏ దేవి కంఠహారమై మంచు ముత్యాల సరాలు కాంతిని వెదజల్లుతాయో, ఏ దేవి వాహనము రాజహంసయై ఉంటుందో , ఏ దేవి చేతులలో చిలుక, పుస్తకము, అక్షమాల, కలిగియుంటుందో, ఏ దేవి బ్రహ్మదేవుని భార్యయో ఆ తల్లిని మనసులో తలచి మాకు (మనకు) శుభముల వెల్లువ ప్రసాదించ వలసినడిగా ప్రార్థించుచున్నాము.