విడువ విడువ నింక విష్ణుడ నీపాదములు

 విడువ విడువ నింక విష్ణుడ నీపాదములు

డా.తాడేపల్లి పతంజలి 

రేకు: 0335-05 సం: 04-206

పల్లవి: విడువ విడువ నింక విష్ణుడ నీపాదములు

కడగి సంసారవార్ధి కడుముంచుకొనిన

చ.1: పరమాత్మ నీవెందో పరాకైయున్నాను

పరగ నన్నింద్రియాలు పరచినాను

ధరణిపైజెలరేగి తనువు వేసరినాను

దురితాలు నలువంకదొడికి తీసినను

చ.2: పుట్టుగు లిట్టె రానీ భువి లేక మాననీ

వట్టి ముదిమైన రానీ వయసే రానీ

చుట్టుకొన్నబంధములు చూడనీ వీడనీ

నెట్టుకొన్నయంతరాత్మ నీకు నాకుబోదు

చ.3: యీదేహమే యయిన ఇక నొకటైనాను

కాదు గూడదని ముక్తి కడకేగినా

శ్రీదేవుడవైన శ్రీవేంకటేశ నీకు

సోదించి నీశరణమె చొచ్చితి నే నికను

భావం

పల్లవి:

ఓ విష్ణుడ ! సంసార సముద్రము నన్ను బాగా ఆక్రమించినప్పటికి నీపాదములు విడువను విడువను.

చ.1:

పరమాత్మ! నన్ను పట్టించుకోకుండా నీవు ఎక్కడో  పరాకై ఉన్నప్పటికి, నన్ను ఇంద్రియాలు పడగొట్టినప్పటికి,

ఈ భూమిపై చెలరేగి నా శరీరం బాధపడినప్పటికి,పాపాలు నాలుగు దిక్కులా నలువంకలకు పట్టుకొని తీసుకుపోయినప్పటికి-  ఓ విష్ణుడ ! నీపాదములు నేను విడువను విడువను.

చ.2:

ఓ విష్ణుడ ! ఎన్నో జన్మలు ఇలా రానీ ! భూమిలో జన్మే లేకుండా పోనీ!!ప్రయోజనం లేని ముసలి వయస్సు రానీ ! యౌవనంలో ఉండనీ !నన్ను చుట్టుకొన్నబంధములు  నన్ను చూసినా, నన్ను  వీడిపోయినా-అతిశయించు అంతరాత్మ నీకు నాకు పోదు.(అనగా అంతరాత్మలో ఎప్పుడు పరమాత్మ ఉంటాడని భావం)

చ.3:

శ్రీవేంకటేశ ! ఈ శరీరమే నాకు ఉన్నప్పటికి  లేదా నీలో కలిసి పోయి ఒకటయినప్పటికి,కాదు కూడదని ముక్తి పొందినప్పటికి ,శ్రీదేవుడవైన నిన్ను నా అణువణువున శోధించి నీశరణము కోరాను.(ఎప్పుడు నిన్ను విడవనని భావం)

***