మానవ భూతం

 మానవ భూతం

(కవిత)

శెట్టిపల్లి అరుణా ప్రభాకర్ 

పూసిందన్న మాటేగానీ 

పుట్టెడు దిగులు పువ్వుకి 

ఎప్పుడు ఎవరు తెంచుకు పోతారో !

దూకుతుందన్న మాటే గానీ 

ఆకాశమంత ఆరాటం జలపాతానికి 

ముందర ఏ మత్తడి ఎదురవుతుందో!

ఎగురుతుందన్న మాటేగానీ 

ఎనలేని భయం పక్షికి 

ఏ విమానం రెక్కలు తన రెక్కలు విరిచేస్తాయో!

వీస్తుందన్న మాటేగానీ  

ఆపుకో వీలు లేనంత దుఃఖం గాలికి 

ఏ దుర్గంధం తనని వెంటాడుతుందో!

కాస్తుందన్న మాటేగానీ 

కనపడని ఆవేదన వెన్నెలకి 

క్రిక్కిరిసిన ఆకాశ హర్మ్యాల మధ్య నేలని ముద్దాడలేనేమో!

నిటారుగా నిలుచున్నదన్న మాటేగానీ 

నిలువలేనంత క్షోభ వృక్షానికి 

ఏ రంపం తన ఎదని కోస్తుందో!

తలెత్తుకుందన్న మాటేగానీ ఆకాశానికేసి 

తలచుకుంటే భయం శిఖరానికి

ఏ డైనమెట్లు తనని పిండి చేస్తాయో!

తిప్పుతుందన్న మాటేగానీ ఋతు చక్రాల్ని

 గుక్క తిప్పుకోనివ్వని సంవేదన ప్రకృతికి

కడుపు చీల్చుకుని వచ్చి 

రొమ్ము పీల్చుకునే మనిషి తనని మింగేస్తాడేమో!